PM I lonshem long yestete 9 November national export development program 2020-2025.

Photo: FM107

Program ia emi blong Vanuatu I save exportem ol local kakae olsem Manioc mo Taro I ko long Niu Zilan.

lonshing blong national export program we Praem Minista Bob Loughmna Weibur, I mekem yestete morning,  I markem tu woktugeta blong gavman blong Vanuatu wetem private sekta blong save start exportem ol aelan kakae I ko long Niu Zilan.

Praem Minista, Minista blong Trade, Minista blong Agrikalja mo ol senior gavman official I witnesim tu ol kontena blong manioc mo taro we wan lokol kampani, Pipol Infrastructure and Export Kampani, tru long public private partnership, I stap fulumap redi blong exportem I ko long Niu Zilan.

Kampani ia weten sapot blong gavman I stap plan blong exportem 50 ton blong taro mo manioc I ko long Auckland, New Zealand long next wik.

Direkta General blong Ministri blong Agrikalja, Livestock, Fisheries, Forestry mo Biosecurity, Moses Amos, I talem se export ia bae emi wan brek tru long market blong Niu Zilan mo bae I kivim wan assurance long ol fama blong oli planem mo aelan.

Moses Amos i mekem toktok ya long lonshing we i tekem place long yestete morning long lapita wharf port vila.