Wan survey we development policy senta long Australia i ranem samfala weeks i pass wetem ol farmers long Australia about tingting blong gavman blong Vanuatu blong karemaot license long ol agent blong seasonal work mo givim long gavman blong hemi managem i karem fulap criticism long ol farmers long australia.

Photo: Supplied

Doctor Richard Curtain blong National Development policy center i talemaot se Vanuatu hemi only succesful country long pacific wetem Australian seasonal worker program mo New zealand recognized seasonal employer program wetem 50 000 man Vanuatu we oli wok since 2017.

Hemi continue blong explenem se sapos Vanuatu i decide blong jenisim program, bambae ol man Vanuatu oli nomo ko anda long seasonal workers program be bambae oli folem gavman led work ready pool olsem narafala kaontri olsem Timor leste mo Kiribati we gavman i recruitem ol wokman.

Doctor Curtain i talemaot se ol farmers long Australia oli no laekem blong recruit long Gavman led work ready pool from politic, mo system ia bae costem moa mani long farmers mo givim tumas work blong processem ol pepa. 

Hemi continue blong explenem se ol kaontri olsem Timor leste mo kiribati we oli folem system we gavman blong Vanuatu i wandem folem naoia oli stap olsem laswan long list blong recruitment blong labours.